ഫേസ്ബുക്ക് പേരുമാറ്റാനൊരുങ്ങുന്നതായി റിപ്പോർ

അമേരിക്കൻ സോഷ്യൽ മീഡിയ ഭീമൻ ഫേസ് ബുക്ക് പേരുമാറ്റത്തിനൊരുങ്ങുന്നു. 'മെറ്റാവേഴ്സ്' എന്ന സ്വപ്ന പദ്ധതി സാക്ഷാത്കരിക്കുന്നതിന്റെ ഭാഗമായി അടുത്തയാഴ്ചയോടെ പുതിയ പേര് സ്വീകരിക്കുമെന്ന് കമ്പനിയുമായി അടുത്ത വൃത്തങ്ങളെ ഉദ്ധരിച്ച് 'ദ വെർജ്' റിപ്പോർട്ട് ചെയ്യുന്നു. ഒക്ടോബർ 28ന് നടക്കുന്ന വാർഷിക കണക്ട് കോൺഫറൻസിൽ ഫേസ്ബുക്ക് സി.ഇ.ഒ മാർക്ക് സക്കർബർഗ്, പേര് മാറ്റത്തെക്കുറിച്ച് സംസാരിക്കാൻ പദ്ധതിയിടുന്നതായും റിപ്പോർട്ടുണ്ട്. അതേസമയം, ഇതുമായി ബന്ധപ്പെട്ട് ഫേസ്ബുക്കിന്റെ ഔദ്യോഗിക പ്രതികരണം വന്നിട്ടില്ല.



ആളുകൾക്ക് പരസ്പരം കാണാനും സംസാരിക്കാനുമെല്ലാം സാധിക്കുന്ന 'ഷെയേർഡ് വെർച്വൽ സ്പേസ്' ആണ് മെറ്റാവേഴ്സ്. വ്യത്യസ്ത ഉപകരണങ്ങളിലൂടെ ആളുകൾക്ക് ഈ വെർച്വൽ ലോകത്ത് പ്രവേശിക്കാനാവും. ഓരോരുത്തർക്കും വെർച്വൽ രൂപമുണ്ടാവും. മെറ്റാവേഴ്സ് സാധ്യമാക്കുന്നതിനായി അഞ്ച് കോടി ഡോളറാണ് ഫേസ്ബുക്ക് നിക്ഷേപിച്ചിരിക്കുന്നത്. ഇന്റർനെറ്റിന്റെ ഭാവിയെന്നാണ് മെറ്റാവേഴ്സിനെ ഫേസ്ബുക്ക് മേധാവി സക്കർബർഗ് വിശേഷിപ്പിക്കുന്നത്. മെറ്റാവേഴ്സിന് വേണ്ടി ഒരു പ്രൊഡക്റ്റ് ടീം രൂപീകരിക്കുമെന്ന് ഫേസ്ബുക്ക് ജൂലൈയിൽ പ്രഖ്യാപിച്ചിരുന്നു. ഫേസ്ബുക്ക് റിയാലിറ്റി ലാബിന്റെ ഭാഗമായാണ് മെറ്റാവേഴ്സ് സംഘം പ്രവർത്തിക്കുക.

0 comments